Grúpa ó Ghaeltacht Mhúscraí sa tóir ar rath uile-Éireann ar stáitse Chaisil

Tá grúpa ceoltóirí, amhránaithe, aisteoirí, agus rinceoirí ó Ghaeltacht Mhúscraí sa tóir ar bhua uile-Éireann an deireadh seachtaine seo sa chomórtas Scoraíocht á reáchtáil ag Comhaltas Ceoltóirí Éireann.

Tabharfaidh baill de CCÉ Craobh Lachtaín Naofa, Cill na Martra, aghaidh ar Chontae Thiobraid Árann ar an Satharn chun a dtaispeántas stáitse Fáilte Abhaile a chur i láthair ag an mbabhta ceannais uile-Éireann i mBrú Ború i gCaiseal.

Is ag grúpa CCÉ Lachtaín Naofa atá an teideal uile-Éireann faoi láthair, tar éis dóibh an comórtas a bhuachaint i 2020, an bhliain deireanach gur reáchtáladh é roimh theacht na paindéime Covid.

Tá an dráma gairid na bliana seo scríofa trí mheán na Gaoluinne ag Seán Ó Muimhneacháin agus stiúrtha ag Treasa Uí Scannláin, le foireann nach mór 40 san áireamh ann, ó aois ocht mbliana go 70 bliain, mar aon le Seosamh Ó Críodáin agus Bernie Uí Cheallacháin ar an bhfoireann léiriúcháin, agus ceol an dráma faoi stiúir Méabh Ní Chonaill agus Nóra de Búrca.

Insíonn Fáilte Abhaile scéal Uncail Joe, atá tar éis filleadh abhaile ó Mheiriceá, an chéad turas ar ais ar a bhaile dúchais le dhá scór bliain.

Tagann na comharsana agus na gaolta go léir le chéile chun fáilte mhór chroíúil a chur roimhe. Téann siad go léir i dteannta a chéile siar ar bhóithrín na smaointe le cabhair na n-amhrán, an cheoil, an rince agus na scéalaíochta.