Ceol agus amhránaíocht Mhúscraí chun cinn le ceiliúradh 50 bliain RnaG tagtha go Baile Mhúirne

BHÍ ceoltóirí agus amhránaithe ó Ghaeltacht Mhúscraí i gcroílár na féile le ceolchoirm á óstáil ag RTÉ Raidió na Gaeltachta i mBaile Mhúirne mar chuid de cheiliúradh 50 bliain an stáisiúin.

Thuirling trí chór, mar aon le scoth na gceoltóirí agus na n-amhránaithe ó cheantair Ghaeltachta na Mumhan i gCorcaigh, i gCiarraí, agus i bPort Láirge, ar Óstán Ghobnatan an Aoine seo caite don cheolchoirm, á chur i láthair ag Sláine Ní Chathalláin agus á chraoladh beo ar an raidió, mar aon le sruthú ar ardáin na meán sóisialta de chuid an stáisiúin.

Dhein Dara Ó Cinnéide, bainisteoir réigiúin na Mumhan do RTÉ RnaG, cur síos ar an gceolchoirm mar “deis chun buíochas a ghabháil le pobal díograiseach lucht éisteachta Raidió na Gaeltachta atá tar éis tacú linn le 50 bliain anuas”.

Thug an ceolchoirm léargas ar shaibhreas na tallainne sna pobail Ghaeltachta i gCúige Mumhan, le ceolchoirmeacha comhchosúla eagraithe sna cúigí eile chomh maith.

I measc na n-aíonna a thug faoin stáitse ag an gceolchoirm bhí trí chór buaite gradam, Cór Fear na nDéise, Cór Chúil Aodha, agus Cór Ban Chúil Aodha, mar aon le hamhránaithe Máire Ní Chéileachair, Anne Mulqueen, Seán Ó Sé, Páidí Mhárthain Mac Gearailt, agus Mossie Ó Scanláin.

I measc aíonna Chorcaí ar an oíche bhí Matt Cranitch agus Jackie Daly le Caoimhe agus Eimhear Flannery, Muintir Mheachair ó Chúil Aodha, agus grúpa Mhúscraí Baois.

Mar chuid den cheolchoirm chomh maith bhí blúire ón gceoldráma nua An Tuairín Dubh, a osclóidh i mBéal Átha ’n Ghaorthaidh ar an 11ú Bealtaine, mar aon le páistí ó Scoil Náisiúnta Chúil Aodha, agus roinnt filíochta ó Dhámhscoil Mhúscraí.