Scéalta Chorcaí: Na Corcaígh ag seinnt go bínn ag Fleadh Cheoil na hÉireann

Tháinig deireadh le mór fhéile an tSamhraidh ag an deireadh seachtaine agus cé ná raibh an deis agam freastal ar na h-imeachtaí spleodracha i Loch Garman, bhí blaiseadh iontach le fail ach bheith ag fáire ar na cláracha gach oíche ar TG4.

Ón méid atá feicthe agam, bhí Corcaigh i lár an aonaigh i Loch Garman agus ceoltóirí, amhránaithe is grúpaí ag tabhairt leo na duaiseanna sna comórtais agus ag mealladh na sluaite ar na h-ardáin éagsúla.

Ó thaobh na gcomórtas de, bhí duaiseanna buaite ag ionadaithe ó chraobhacha Bhaile Núis, Baile an Chollaigh, Cillín Chrónáin agus Lachtaín Naofa ar an Satharn agus roinnt fós sa reicneáil sna comórtais a bhí fágtha. Bhuaigh Greenhill ó CCÉ Bhaile Núis an chéad áit sa chomórtas don Bhanna Chéilí (15-18) agus d’éirigh le Finín Ó Conaill sa chomórtas don rince sean nóis ós cionn 18. Bhí an bua ag Oisín Ó Conchúir ó CCÉ Cillín Crónáin sa chomórtas don bhfeadóg mór (12-15) agus fuair Matthew Ó Tuama ó Chúil Aodha (CCÉ Lachtaín Naofa) an tríú áit san amhránaíocht ar an sean nós (faoi 12).

Ar ndóigh, bhí amhránaithe, ceoltóirí is grúpaí den scoth ó Chorcaigh le feiscint sna cláir iontacha a bhí á gcraoladh beo ó Loch Garman gach oíche idir Déardaíon is an Domhnach. Ina measc bhí Kabin Krew ó thuaisceart chathair Chorcaí le amhrán brea as Gaeilge, ní minic a chloiseann tú rap cheol ag an bhFleadh Cheoil. Bhí siad gach pioc chomh maith le hEd Sheeran!

Bhí Iarla Ó Lionáird le feiscint agus é ag canadh freisin ag an bhFleadh Cheoil – níl i bhfad le taisteal ag fear Chúil Aodha le dul chomh fada leis an bhFleadh nó tá cónaí air i gContae Chill Chainnigh. Nuair a thagann an Fleadh Cheoil go Corcaigh roimh 2030, beidh sé ábalta taisteal ann ó Chúil Aodha!

Ceol sa scioból in iarthar Chorcaí

Deireann siad i gConamara gur fánach an áit nach bhfaighfeá gliommach. Agus rith an nath cainte sin liom agus mé ag suí i scioból san iargúltacht in iarthar Chorcaí, áit ná raibh ró fhada ó Thrá an Choincéara, ag éisteacht le ceol comhaimseartha as Gaeilge.

Níorbh é Fleadh Cheoil na hÉireann a raibh ann ach fleadh dheireadh seachtaine a raibh á reachtáil ag úinéirí Fheirm Camus, feirm ar a bhfuil bialann mór le rá, Field Kitche/Cistin Pháirce. Bhí go leor grúpaí ann thar an deireadh seachtaine, grúpaí a d’aithin úinéirí na feirme go raibh gealladh iontu agus gurbh fhiú ardán a thabhairt dóibh.

Tá creidiúint mór ag dul d‘úinéirí na bialainne gur thug siad ardán do dhá ghrúpa a cheolann as Gaeilge, IMLÉ atá baill acu ó Chonamara, Baile Átha Cliath agus Corcaigh, agus Huartán, arbh as Béal Feirste dóibh.

Is iad seo na bannaí a rabhas ag iarraidh éisteacht leo, dá fheabhas iad na bannaí eile. Agus ba mhór an sásamh a thug siad. Tá IMLÉ ann le blianta fada agus tá siad snasta dá réir. Ceolann siad ábhar atá taithneamhach is cuma cén teanga ina bhfuil siad. Bhíodh Niall Ó Briain, an dord ghiotaraí leo, ag obair trath i nGael Taca i gCorcaigh ach tá sé anois ag staidéar i mBéal Feirste.

Banna iad Huartan a sheineann ceol ar a dtugann siad ‘TradTronic’ agus tá teachtaireacht laidir pholatúil acu – is cinnte gur fiú iad a fheiscint beo.

Borradh na Gaelscolaíochta cois Laoi

Is comhartha iontach ar an mborradh ar an ngaeloideachas cois Laoi an scéal go bhfuil conraitheoir ainmnithe chun tabhairt faoi shineadh mór a chuir ar an meán scoil Ghaeilge i dtuaisceart na Cathrach, Gaelcholáiste Mhuire A.G. atá suite ar champas na Mainistreach Thuaidh.

Foirgneamh €16m le 25 seomra ranga agus áchar iomlán de 4600 méadar cearnach atá beartaithe don scoil nua agus beidh spás ann do 750 dalta. Togra é seo atá maoinithe go h-iomlán ag an Roinn Oideachais fén gclár chaiptil ar mhór scála.

“Is mór an chéim chun tosaigh é seo don oideachas ar an dtaobh ó thuaidh den gcathair,” dúirt Colm Burke, Teachta Dála Fhine Gael i gCorcaigh Lár Thuaidh. “Is vóta muiníne atá ann ní h-amháin don scoil ach don ceantar ar fad.”

Thug an Teachta Burke moladh do phríomhoide na scoile, Dónal Ó Buachalla, agus don Aire Oideachais, Helen McEntee, freisin.

Dúirt an tUasal Ó Buachailla go raibh gá leis an mór thogra seo le tamall mar gheall go raibh an oiread san éileamh ar áiteanna sa scoil. “Tá sé go h-iontach go mbeimíd ábalta riar a dhéanamh ar riachtanais na scoláirí ar mhaith leo freastal ar an scoil agus a gcuid oideachais a fháil trí mheán na Gaeilge.”

Thug sé le fios go mbeadh sé dúshlánach an scoil a choimeád ar oscailt agus an togáil ag dul ar aghaidh ach gur sin ceist dos na togálaithe.

“Beidh ár ndáltaí ag súil go mór leis na h-áiseanna is nua aimseartha bheith ar fail doibh ar an gcampas.

“Beidh seomraí nua le h-aghaidh dearadh, na h-iomheáin a thacóidh linn ábhair bunaithe ar eolaíocht, códáil agus na meáin digiteacha a fhorbairt.

“Táimíd ag súil go mbeimíd ag forbairt ár ndáltaí agus ag cuir oideachas iomlán ar fail.”

Oíche cheoil ag Gaeil Charraig Thuathail

Beidh oíche mhór ceoil ag ‘An Charraig Ag Caint‘ an tseachtain seo chughainn nuair a thiocfaidh siad le chéile i dTeach Fóta d’oíche mhór ceoil.

Ar oíche Dhéardaoin, Lúnasa 21, beidh an phiobaire Mick O’Brien agus a iníon Aoife(bheidhleadóir) ag seinnt agus chun tús a chuir leis an oíche beidh Aoife agus Deirdre Granville. Beidh Cárthach Mac Craith ann freisin ós na Déise.

Má tá ticéad uait, beidh fáilte romhat ach focal a chuir tre glaoch ar 086 2618034. Is féidir téacs a chuir freisin gan amhras.

Bhíos ag an oíche seo anuraidh agus ba choirm ana thaithneamhach ar fad a raibh ann!

Foclóirín – glossary

• Imeachtaí spleodracha – Exciting events
• Ag mealladh na sluaite – Drawing the crowds
• Baile Núis – Newcestown
• Cillín Chrónáin – Freemount
• Lachtaín Naofa – Cill na Martra
• Baile an Chollaigh – Ballincollig
• Scioból – Barn
• Creidiúint mór – Great credit
• Úinéirí na bialainne – Owners of the restaurant