Scéalta Chorcaí: Siamsa cois Laoi le Ráidió Rí-Rá go ceann seachtaine

Beidh deis ag breis is 80,000 cainteoir Ghaeilge atá ag cur futhu i gCorcaigh, idir an chathair is an chontae, ábalta cluas a thabhairt dos na rianta ceoil is nua sna cairteacha le trachtaireacht Ghaeilge an tseachtain seo nó tá Ráidió Rí-Rá á chraoladh ar an ard mhinicíocht go dtí deireadh na seachtaine.

Tá foireann Raidió Rí-Rá ag tabhairt cuireadh oscailte go dtí an cóisir dá lucht éisteachta agus cúig lá beo ar FM óna stiúideo nua á cheiliúradh acu.

Beidh Raidió Rí-Rá le cloisteáil ar aerthonnta Bhaile Átha Cliath (105.2fm), Luimnigh (105.5fm), Chorcaí (106.7fm), agus na Gaillimhe (87.7fm) - maraon le gnáthbhealaí éisteachta an stáisiúin ar rrr.ie agus ar aip Raidió Rí-Rá ar Apple agus ar Android - ar feadh na seachtaine seo chugainn.

Tá an tréimhse seo ar FM á reáchtáil mar chuid den bhfeachtas leanúnach atá ag Raidió Rí-Rá a stáisiún náisiúnta Gaeilge don aos óg a chur ar aerthonnta náisiúnta ar bhonn lánaimsertha. Mar sin, beidh an stáisiún féin le cloisteáil ar FM 27-31 Eanáir (Dé Luain - Dé hAoine) le sceideal beo ar an aer 7rn - 7in agus cláracha réamhthaifeadta agus ceol istoíche.

Dar le Cathaoirleach Raidió Rí-Rá, Traic Ó Braonáin go bhfuil an stáisiún “ag léiriú arís agus arís go bhfuil tóir ar stáisiún náisiúnta Gaeilge don aos óg, agus gur féidir le Raidió Rí-Rá, a bunaíodh ar an gcúis chéanna sin, an seirbhís a sholáthar.” Cloisfear craoltóirí reatha Raidió Rí-Rá idir fhoireann agus craoltóirí deonacha ag cur cláracha ceoil, cúrsaí nuachta, ábhar cainte agus siamsaíochta i láthair ó mhaidin go hoíche ar feadh na seachtaine.

Deir Emma Ní Chearúil, Bainisteoir an Stáisiúin gur “údar bróid dúinn an sceideal spleodrach snasta atá le craoladh againn a bhuí lenár bhfoireann díograiseach agus craoltóirí iontacha óga a bhíonn ag cruthú ábhar don aos óg féin.

“Tá tuiscint ar leith againn ar an rud atá ónár bpobal éisteachta agus beidh a scáth sin le cloisteáil ar an aer idir ábhar cainte, rogha ceoil agus na cineálacha cláracha a bheidh á soláthair againn.” Beidh Ráidió Rí-Rá le clos go dtí Dé hAoine ar an minicíocht 106.7fm i gCorcaigh.

Oíche mhór amharclannaíochta in Áras Éamonn Mac Suibhne

Bhí Áras Éamonn Mac Suibhne lán go doras ar Oíche na Gaoithe Móire Déardaoin seo cháite le h-aghaidh drama nua scríofa le Siobhán Ní Mhúineacháin a léirigh cliar agus criú ildánach de mhúinteoirí agus de dháltaí Scoil Náisiúnta Chúil Aodha/Barr d’Ínse.

An oíche amharclannaíochta a thug siad dúinn, oíche a thug chun cuimhne oícheannta órga eile sa halla céanna nuair a bhíodh dramaí ar an ardán ann go minic agus an halla lán i gcónaí. Ní raibh aon trácht ar Netflix an uair sin!

De réir an chláir, bhí an dráma, a bhuaigh duais Oireachtais i 2021 do dhramaí bunscoile, bunaithe ar fhíor eachtra a thit amach i gCúil a’ Bhuachaigh sna 1950í. “Ag an am sin dhío feirmeoir ó lios a bhí aige ar a thalamh leis an gComhairle Chontae do dheisiú is tógáil bóithre,” deirtear sa chlár. Nior lean dea-adh aon bheart dá leithéid agus sin é bun agus barr an drama. Is é croí an drama, afach, na taispeántaisí iontacha a thugann gach paiste ar an ardán – agus iad san ar chúl ardán freisin – chun an léiriú seo a chur le chéile agus ós ár gcomhair. Bheadh dream an ‘West End’ i Londain in éad leo! Bhí traidisiún na dramaíochta beo i gCúil Aodha ar feadh na mblianta fada agus seans go raibh sé imithe i léig – ach tá sé ar ais arís. Tá ard mholadh ag dul dom’ shean scoil, dos na daltaí is na múinteoirí is gach éinne eile a thug cabhair, idir ealaíontóirí ar nós Eibhlín Watkins, an ceoltóir Ger Wolfe agus go leor eile. Ana léiriú ag Siobhán Ní Mhuimhneachain í féin. Encore!

Agus chuaigh gach éinne abháile slán sabhailte sara tháinig Stoirm Éowyn i lár na h-oíche chun na soilse a mhúchadh i gCúil Aodha agus timpeall na tíre!

Aire Gaeltachta le Gaeilge, an rud is annamh is iontach

B’fhéidir nach mbionn an t-adh le peileadóirí Mhaigh Eo agus iad ag imirt i bPáirc an Chrócaigh, ach bhí an dearg adh le Dara Calleary, Teachta Dala de chuid Fhianna Fáil ó Mhaigh Eo, atá ceaptha ina Aire Gaeltachta ag an dTaoiseach, Mícheál Martin.

Is polaiteoir é Dara a labhrann Gaeilge agus bionn sé le clos go minic ar TG4 agus RTÉ RnaG agus tá fáilte curtha roimh a cheapachán ag Conradh na Gaeilge agus a thuilleadh i ngluaiseacht na teangan.

Ar nós go leor Áirí eile sa Chomhaireacht, beidh cúramaí eile ar Dhara – coimirce shoisíalta, gnóthaí tuaithe agus pobail. – ach ós rud é gur éilíodh go mbeadh Aire Sinsearach Gaeltachta le Gaeilge ann – agus gur ceapadh fhear Mhaigh Eo sa phost, is tús mhaith é sin.

Michelle tar éis ard phost a fháil san Údarás

Tá Michelle Ní Chróinín ó Bhaile Mhic Íre ceaptha le bheith ina ceannasaí margaíochta is cumarsáide ag Údarás na Gaeltachta, tá sé fógartha. Tá breis is 25 bliain taithí ag Michelle i réimsí na cumarsáide straitéisí, na meán, na margaíochta agus an rialachais chorparáidigh. Tagann sí chuig an ról ó phost mar Stiúrthóir Straitéise agus Pleanála in Ollscoil na Gaillimhe, áit ar stiúir sí forbairt chéad Straitéis Ghaeilge na hOllscoile agus an tionscadal athbhrandála. Roimhe sin, chaith sí 13 bliain mar Cheann Preasoifige na hOllscoile. Bhí sí ina comhalta ar bhórd TG4 idir 2012-22. “Ba dhuine ón nGaeltacht mé agus tá an-áthas orm filleadh ar mo dhúchas Gaeltachta le hÚdarás na Gaeltachta,” arsa Michelle agus a ceapachán fógartha.

“Tá an eagraíocht lárnach i gcreatlach chultúrtha agus eacnamaíochta Ghaeltachtaí na hÉireann.” Dúirt Tomás Ó Síocháin, Príomhfheidhmeannach: “Beidh saineolas fairsing Michelle ar chumarsáid straitéiseach, a cumas ceannaireachta, agus an ceangal domhain atá aici leis an nGaeltacht fíorluachmhar agus muid ag tabhairt faoin gcéim straitéiseach nua seo.” 

Tá Michelle ina cónaí lena clann i gContae na Gaillimhe. Iníon í le Seán Ó Cróinín, a cailleadh anuraidh, ceannródaí i stair tionsclaíoch na Gaeltachta agus crann taca le Naomh Abán CLG i mBaile Mhúirne. D’imir a dearthar, Mícheál, le peileadóirí Chorcaí i gCluiche Ceannais na hÉireann i 1999.