SCÉALTA CHORCAÍ: Tús á chur leis an Samhradh cois Suláin

Bhí ocáid dheas i gCúil Aodha le déanai nuair a deineadh bronnadh ar an mheitheal a thugann aire don Linn Snámha sa sráid bhaile beag Gaeltachta as a gcuid iarrachtaí chun an Ghaeilge a chur chun cinn.

Tá sin fíor - creid é nó ná creidtá linn snámha i gCúil Aodha agus beidh sé ag oscailt don Samhradh ar Bealtaine 24. 

Cosúil leis an gcuach agus an Chincís, is comhartha é go bhfuil an Samhradh tagtha go dtí an sráidbhaile.

Scéim de chuid Glór na nGael atá i gceist chun gnóanna a spreagadh le spás a dhéanamh don Ghaeilge agus bhí Linn Snámha Chúil Aodha i measc na bhfiontair áitiúla a fuair aitheantas fén scéim. 

Tá sé á riaradh go h-áitiúil anseo i Múscraí ag Comharchumann Forbartha Mhúscraí agus bhí oifigeach phleanála teanga an Chomharchumainn, Éibhlín Ní Lionáird, agus Pádraig Ó Neachtain ann chun an bronnadh a dhéanamh ag an linn.

Tá an linn snámha i gCúil Aodha ó na luath 70í nuair a thóg Comhaltas Cosanta Ghaeltacht Chúil Aodha an áis ar mhaithe le riar a dhéanamh ar na Coláistí Samhraidh a bhíodh á reachtáil sa dhúthaigh ós na luath 50í. 

Chríochnaigh na cúrsaí sin ag deireadh an chéid seo cháite de bharr go raibh athrú mór saoil ann - ní bhíodh ‘na mná tí’ sa bhaile níos mó, bhí gach éinne ag obair agus mar sin ní raibh loistín ar fáil.

Ach lean an linn a bheith ar oscailt agus tá meitheal de mhuintir na h-áite ag tabhairt aire do ó shin. Jehr Ó hÉalaithe an t-é a thugann aire do chothabháil is na cúramaí sin agus is í Siobhán Ní Laocha a bhíonn i mbun cúrsaí snámha is tarrthála.

Níorbh ar an Linn Snámha amháin a bronnadh gradam le déanai - fuair an caifé áitiuil, An Cruiscín Lán gradam freisin agus bhí aitheantas freisin do Ostán Guagán Barra agus an chomhlacht bídh agus suibhe, Folláin.

Comhghairdeas leo go léir.

Bliain chinniúnach do Bhard na nGleann

Níos túisce i mbliana, cailleadh an fear gnó ildánach agus ceannródach, Tomás Mac Gearailt, an t-é a bhunaigh an chomhlacht Bard na nGleann agus, ina dhiaidh sin, bhunaigh sé www.litriocht.com, siopa ar líne do leabhair as Gaeilge.

Baineadh geit asainn go léir nuair a tháinig an scéal ó Chalifornia go raibh Tomás imithe ar shlí na fírinne go tobann. Bhí ocáidí cuimhneacháin i mBéal Átha’n Ghaorthaidh agus Corca Dhuibhne, ceantar dhúchais Thomáis.

Tárlaíonn sé, áfach, go bhfuil Bard na nGleann 25 bliain ar an bhfód i mbliana agus lean an chomhlacht ar aghaidh le plean chun ceiliúradh a dhéanamh ar an gcloch mhíle tabhachtach ar an dturas a thosnaigh Tomás Mac Gearailt i 1999.

Bhí an ocáid ar bun in Ostán Woodlands in Ath Dhara agus chaith an fhoireann an lá go léir ann. 

Ceann des na h-imeachtaí a raibh ar bun ag an ngrúpa ná ag cruthú soilse grian chumhachtaithe a bheadh á gcur acu go dtí páistí i gceantair ar fuaid na cruinne atá bochtanas fuinnimh ag cur as dóibh.

B’é William, mac Thomáis agus príomhfheidhmeannach Bard, an fhear a tí ar an lá.

Is comhlacht é Bard go bhfuil sprioc aige agus tá sé tabhachtach mar sin go dtagaimíd le chéile chun aitheantas a thabhairt don ocáid agus ceiliúradh a dhéanamh ar an ndul chun cinn atá déanta againn,” dúirt sé.

B’é Bard ceann des na céad comhlachtai chun rogha cian oibre a chuir ar fáil dá bhfostaithe agus bhí sé ceannródach i gcónaí.

Is léir go bhfuil an turas seo chun leanúint agus go n-éirí leo.

Aitheantas do Niamh

Tá aitheantas faighte ag an bhfiontraí ildánach ó OIleán Cléire, Niamh Ní Dhrisceoil, ag Gradaim Bean Ghnó na Bliana a d’eagraigh an iris Image i gcomhar leis an gcomhlacht comhairleoireachta, PWC (Price Waterhouse Coopers).

Bhí Niamh ar an ngearrliosta don ghradam Fiontraí Shoisíalta na Bliana dos na gradaim iomráiteacha seo. 

Is é seo an sé bliain deag de na gradaim seo agus i measc na mbuaiteoirí ón am atá caite tá leithéidí Sinéad McSweeney, iar phríomhfheidhmeannach Twitter in Éirinn.

Bean gnóhach í Niamh nó is scipéir í ar chaladh a thógann daoine amach go Cléire agus, anuas ar sin, bíonn sí ag múineadh i gColáiste Choilm i mBaile an Chollaigh.

Beidh a thuilleadh le clos ó Niamh gan aon amhras.

Ag file ar an bhfiíocht

Tá ocáid deas chun a bheith i mBaile Mhúirne ag an deireadh seachtaine nuair a thabharfar an fhile aitheanta, Seán Ó Riordáin, chun cuimhne.

Dáimh Scoil Mhúscraí Uí Fhloinn agus Meitheal Gaolainne Chúil Aodha atá i mbun na h-ocáide agus séard atá i gceist ná go mbeidh siúlóid againn timpeall ar an gceantar inar rugadh agus inar tógadh an fhile agus beidh aisteoir ag aithris roinnt dá dhánta ag na láithreacha éagsúla.

Tá an ocáid saor in aisce agus is iarracht atá ann tús a chur le feachtas chun an líon mhór sár fhilí a rugadh nó a tháinig chun cónaithe i Múscraí.

Tá an Riordánach curtha i Reilig Ghobnatan agus ina theannta sa reilig úd tá leithéidí Liam Ó Muirthille, An Suibhneach Meann agus go leor eile.

Is iontach an oidhreacht filíochta i Múscraí agus tá sé cuí go ndéanfar é a cheiliúradh. 

Tús freisin a bheidh ann le roinnt imeachtaí chun ceiliúradh a dhéanamh ar 100 bliain de Dháimh Scoil Mhúscraí a cuireadh tús leis deieadh seachtaine na Cincíse i 1925.

Beidh an ocáid seo ag tosnú ag 3in ar an Satharn beag seo agus is ag An Muileann i mBaile Mhúirne a bheimíd ag teacht le chéile. 

Tá an ocáid saor in aisce agus beidh cupán tae ar fáil - má tá rud níos laidre ó dhuine, is fút féin a bheidh an chuid sin den mhargadh.

Sprioc am

Seol bhúr scéalta chugham le bhúr dtoil Is rud tabhachtach é an sprioc am i ghnó na h-iriseoireachta. Bíonn ar an iriseoir alt a sheoladh go dtí na h-eagarthóirí roimh am áirithe chun go mbeidh siad ábalta é a ullmhú is a cheartú le bheith i gcló. 

Má chailltear an sprioc am, téann rudaí in aimhréidh.

Is é an sprioc am don gcolún seo ná an Mháirt roimh ré ag 5in. 

Mar sin más mian leat do scéal a bheith ar an leathnach seo an Mháirt seo chughainn, Bealtaine 21, bíodh do chuid eolais seolta chuig concubhar.oliathain@theecho.ie roimh 5in trathnóna inniu, Dé Máirt, Bealtaine 14.