Scéalta Chorcaí: Filleadh ar an ghnath shaol tar éis Féile aislingeach na Laoch

Fán am a léann tú seo beidh an chéad mhír d’Fhéile na Laoch thart le cúpla lá – ach tá draíocht a gineadh ar an gcéad oíche aislingeach sin ar Pháirc na Laoch i gCúil Aodha, oíche Lúnasa, atá linn go fóill agus a bheirimíd linn go ceann i bhfad.

Ar eagla nach bhfuil tú ar an eolas faoi Fhéile na Laoch, seo féile gairid a raibh ar bun i gCúil Aodha ag an deireadh seachtaine chun ceiliúradh a dhéanamh ar Sheán Ó Riada, an t-é a chum Mise Éire agus an cheol d’iomainn a bhionn le clos ar fuaid na cruinne nuair a bhailíonn Gaeil, leithéidí Ag Críost An Síol, Ár nAthair, Críost Liom, A Rí an Domhnaigh agus eile, agus laochra eile.

Bhí oíche go maidin chun an Riadach agus na laochra eile atá imithe romhainn a cheiliúradh, ocáid a tharla amuigh fén aeir, aeríocht.

Mhair sé ó luí na gréine Déardaíon go dtí breacadh an lae Dé hAoine, Lá Lúnasa, lá breithe an Riadach. Bheadh sé 94 dá mairfeadh sé beo.

Bhí go leor Corcaígh i measc na laochra a ghlac páirt san aeríocht, leithéidí an fhile is an amhránaí, John Spillane, an scríbhneoir Cónal Creedon, Seán Ó Sé an amhránaí agus an scéalaí Pat ‘the hat’ Speight. Bhí muintir na h-áite ann freisin – Seán Óg Ó Duinnín a d’inis scéal Fiannaíochta, na rínceoirí seite ó Chluain Chaoin faoi cheannas John ‘the Leaper’ Lynch agus mé féin ó Dháimh Scoil Mhúscraí Uí Fhloinn.

Agus tháinig plúr Éireann agus Alba na gceoltóirí is na h-amhránaithe freisin, leithéidí Martin Hayes (ceol traidisiúnta), John Donegan (Snag Cheol), Giordaí Ua Laoghaire (Ceol na Linne seo agus an Todhchaí) agus Ailean MacDhòmhnaill, piobaire mhór na hAlban.

Bhí aisteoirí iomráiteacha ar an ardán freisin, leithéidí Stephen Rea agus Ray O’Sullivan agus chun deireadh a chuir leis an aeríocht, cheol ceolfhoireann Mise Éire agus an ghrian ag éirí.

Lean na ceiliúrthaí ina dhiaidh sin le coirmeacha ceoil le lucht Comhaltas Ceoltóirí Éireann ar an Aoine agus le buaiteoirí Chorn Uí Riada (amhránaíocht ar an sean nós) agus Bonn Ór Uí Riada (ceol uirlise) ar aon ardán le chéile.

I measc na gceoltóirí agus amhránaithe tháinig Éimear Flannery ó Sheipéal na Carraige, Nell Ní Chróinín, Conchubhar Ó Luasa agus Máire Ní Chéilleachair ar an ardán.

Lá spioradálta abea an Domhnach agus seirbhís I Séipéal Ghobnatan chun an ghné sin de shaothar an Riadaigh a thabhairt chun cuimhne agus féachaint a thabhairt, b’fhéidir, ar an dtodhchaí atá romhainn ó thaobh na spioradáltachta de agus an líon daoine atá á n-oirniú ina sagairt ag dul I léig.

Conas a bheidh pobail in áiteanna beaga ar nós Cúil Aodha ábalta leanúint leis an ghné lárnach sin inár saol i mbaol?

Is cinnte go dtugann Féile na Laoch údar machnaimh dúinn. I ré seo na bhféilte móra ceoil ar nós Electric Picnic agus All Together Now, tá Féile na Laoch éagsúil.

Tá gach imeacht saor in aisce. Ní bhionn sé ann ach uair amháin gach seacht mbliain.

É sin ráite bionn dhá mhír ann gach seachtú bliain – an aeríocht agus an ceol chun breith an Riadaigh a cheiliúradh timpeall Lá Lúnasa agus ansan, ag an céad dheireadh seachtaine de Dheireadh Fómhair, bionn clabhsúr na féile, trath go dtugtar chun cuimhne gur bhasaigh an Riadach ar an dtríú lá de Dheireadh Fómhair 1971 (gan é ach dhá scór bliain d’aois).

Beidh ceolchoirmeacha ann an uair úd freisin – is féidir tuilleadh eolais faoin mhír den fhéile atá le teacht agus taifid den mhír den fhéile atá díreach thart a fháil ag www.feilenalaoch.com.

Tháinig na céadta daoine go Cúil Aodha don gceiliúradh ar leith seo ag an deireadh seachtaine agus chruthaigh sin rud éigean ar leith ann féin, “Seal na h-Aislinge”.

Níl in aon ní ach seal. Tagann deireadh leis an spás nó an am sin agus fiilleann gach éinne ar an saol mar atá – ach maireann an aisling inár gcroíthe. Go mbeirimíd beo go dtí Féile na Laoch 2032.

Foclóirín – glossary

• An chéad mhír - the first part.
• An ghnath shaol – day to day life.
• Filleadh – return.
• Draíocht a gineadh – magic that was generated.
• Oíche go maidin - Night till morning (dusk till dawn).
• Go leor Corcaígh – plenty of Cork people.
• Aisteoirí iomráiteacha – famous actors.
• Spioradáltacht – spirituality.
• Gné lárnach – central element.
• Taifid – recordings.
• Seal na h-Aislinge – dreamtime.