SCÉALTA CHORCAÍ: Seal eile le fáil ag na pleananna teanga i nGaeltachtaí na tíre

Tá Roinn na Gaeltachta tar éis freagra dearfach a thabhairt ar fhiosrú a rinne an leathnach seo chun freagra na ceiste seo a dheimhniú.

Cad a tharlóidh don bpleanáil teanga nuair a bheidh an seol rite le h-aghaidh na pleananna atá á gcur i gcrich faoi láthair?

Mar is eol dúinn, tá pleananna teanga á gcur i bhfeidhm i 26 limistéir pleanála teanga atá scaipthe ar fuaid na tíre. Tá dhá limistéir pleanála teanga i gContae Chorcaí - Múscraí idir An Mons taobh thiar de Mhaigh Chromtha agus teorainn an chontae agus Oileán Cléire.

De réir eolas a tháinig ó Roinn na Gaeltachta mar fhreagra ar fhiosrú ón ‘Echo’, tá sé i gceist, dealraíonn sé, go mbeadh seal seacht mbliana eile ag na pleananna teanga - agus na h-oifigigh atá á gcur i bhfeidhm - nuair a thagann deireadh lena gcéad sealanna sna míonna agus na blianta romhainn. Tá dornán a thosnaigh i 2017 agus cuireadh tús le Plean Teanga Mhúscraí i 2018 nó b’shin an uair a síníodh an chonradh idir an cheanneagras, Comharchumann Forbartha Mhúscraí, agus an tÚdarás/An Roinn. Is i 2021 a tosnaíodh Plean Teanga Cléire.

Beidh le feiscint conas a chuirfear san áireamh blianta caillte na Paindéime nó toscaí eile san áireamh ar na blianta.

Faoi láthair tá comhlacht chomhairleoireachta ag ullmhú tuarascála bunaithe ar athbhreithniú atá déanta acu ar an gcéad deich phlean teanga. Ach, sara bhfoilseofar rud ar bith, is féidir a rá gur féidir go mbeadh faoiseamh éigean sa mhéid seo ón ráiteas a sheol an Roinn chuig an nuachtán seo.

“Cuirfear aiseolas maidir le feidhmiú na bpleananna ar fáil agus, bunaithe ar an méid a aithnítear san athbhreithniú, beifear in ann céimeanna a ghlacadh chun cur i bhfeidhm an phróisis phleanála teanga a fheabhsú.

“Bheifí ag súil go mbeadh pleananna nua don chéad tréimhse seacht mbliana eile á ndréachtú i gcomhar leis an bpobal, i mbliain a 6 d’fhéidhmiú na bpleananna reatha, chun go mbeadh leanúnachas i gcur i bhfeidhm an phróisis phleanála teanga ar an talamh.

“Cuirfear moltaí an athbhreithnithe san áireamh agus an obair seo ar bun ag na ceanneagraíochtaí pleanála teanga chomh maith.” An chéad tréimhse eile seacht mbliana eile - léigh sibh san Echo ar dtúis é! Is leor nod don eolach!