Cloíonn an bhuíonn phíobairí le traidisiún Lá Fhéile Pádraig in ainneoin srianta an choróinvíris

Cloíonn an bhuíonn phíobairí le traidisiún Lá Fhéile Pádraig in ainneoin srianta an choróinvíris

Máirín Uí Thuama, rúnaí Bhuíonn Phíobairí Béal Átha ’n Ghaorthaidh, ag seinnt na píobaí ag meán-lae Lá le Pádraig. Grianghrafadóir: Nóirín Uí Thuama

Tá na hIodálaigh ag canadh óna gcuid balcóiní le linn paindéim an choróinvíris, ach i sráidbhaile Bhéal Átha’n Ghaorthaidh i nGaeltacht Mhúscraí b’iad na píobaí a sheinn nóta “dlúthpháirtíochta agus spiorad pobail” ar Lá le Pádraig.

Bhí ard-fhonn ar bhaill de Bhuíonn Phíobairí Béal Átha’n Ghaorthaidh cloí leis an traidisiún atá acu seinnt ar Lá le Pádraig, in ainneoin na srianta atá ann i láthair na huaire maidir le bailiúcháin sóisialta.

Leis an bparáid áitiúil ag a sheinneann siad de ghnáth curtha ar ceal, d’aontaigh baill na buíne aghaidh a thabhairt ar an traidisiún ar bhonn difriúil le gach duine acu ag seinnt ‘Dóchas Linn Naomh Pádraig’ lasmuigh dá dtithe féin ag meán-lae ar lá an naomh patrúin náisiúnta.

Thug daréag píobaire faon gceiliúradh, lena gcuid ceoil á chlos ó Chéim an Fhia, ar fud paróiste Bhéal Átha’n Ghaorthaidh, agus chomh fada le Screathan in aice le Cúil Aodha.

Tá traidisiún ceoil bródúil ag an mbuíonn phíobairí, a bunaíodh sa bhliain 1928, a sháraigh an Dara Cogadh Domhanda fiú, agus siombal thar a bheith tábhachtach a bhí don phobal trí chéile chomh maith leis na píobairí féin cloí leis an traidisiún sin ar Lá Fhéile Pádraig i mbliana.

Dúirt rúnaí na buíne Máirín Uí Thuama, duine den daréag píobaire a sheinn ar Lá le Pádraig: “Taispeántas dlúthpháirtíochta agus spiorad pobail a bhí ann. Táimid ar fad sa chás seo i dteannta a chéile.

“Tháinig sé ón smaoineamh go bhfuil muintir na hIodáile ag canadh dá chéile trasna na balcóiní,” a dúirt sí.

“Má thugann sé ardú meanma do dhuine éigin, sin é cuspóir an chleachtais, mar táimid ar fad suite in áit thar a bheith neamhchinnte éidearfa i láthair na huaire.

“Níor scar an bhuíonn riamh, fiú le linn an chogaidh nuair nach raibh aon bhreosla ná faic eile acu,” a dúirt sí.

Le roinnt blianta anuas tá an sráidbhaile tar éis paráid Lá le Pádraig iontach beoga a sholáthar lá de sceitsí grinn, ach téann traidisiún ceoil na buíne píobairí ar an 17ú Márta siar i bhfad níos faide ná sin, a mhínigh sí.

“Sular fhás an paráid chomh mór agus atá sé inniu, bhí na blianta fada ann nuair nach mbíodh aon rud i mBéal Átha ’n Ghaorthaidh tar éis Aifrinn Lá le Pádraig, ach thagadh an bhuíonn amach ag seinnt. Tá an bhuíonn 92 bliain ar an bhfód i mbliana agus sheinneadar i gcónaí riamh ar an lá sin.” Bhí suntas breise leis an bhfonn a sheinn na píobairí i mbliana, a dúirt sí, go háirithe le géarchéim an choróinvíris.

“An fonn a sheinneamar ná ‘Dóchas Linn Naomh Pádraig’. Seinnimid an fonn sin i gcónaí ar Lá le Pádraig nuair a bhímid amuigh i mbun paráid, os comhair an seastáin féachana de ghnáth. D’fhoghlaimíos féin é sa bhunscoil mar pháiste agus is é sin an fonn a sheinntear i gcónaí do Lá le Pádraig,” a dúirt Máirín.

“Bhí an fonn thar a bheith oiriúnach i mbliana de bharr an dóchas a theastaigh uainn a scaipeadh i measc an phobail.”

More in this section

Sponsored Content